Yadnya sané pinih seringa mamargi wantah ring déwa yadnya. Samaliha maageng-agengan. Wantah sampun ageng kaucap utama. Arang wénten pikayunan ngamargiang yadnya ring manusa sané kalaran. Ring sang katinggalan rerama. Ring anak sané nénten mresidayang ngranjing. Nénten mresidayang naur prebia ring sakolah. Punapi malih ring anak lingsir-lingsir sané sampun wreda,sané nénten mresidayang makarya malih. Sané sungkan-sungkanan.

Sapunika taler yadnya sané marupa bhuta yadnya. Bhuta yadnya nénten marupa caru utawi taur kémanten. Yadnya sané patut tragiang pisan, yadnya ring ibu pretiwi. Urati ring kawéntenan ibu pretiwi. Genahé nunas amerta. Arang sané mautsaha matanduran wit taru. Alasé karabas. Ring pinggir pikantenan becik alasé sakéwanten ring tengah sampun telas wit taruné sané ageng-ageng Toyan danu alit taler durung wénten pikamkam mecikang palemahan.

Sanghyang Widhi mayadnya ngwetuang bhuana agung-alit. Matetujon mangda antar kauripané. Mangda hita kauripané. Manusa pinaka sinalih tunggil buana alit patut pisan ngaturang yadnya. Santukan wénten rna ( utang) sané patut kataur. Penauran rna marupa pamargi utawi upakara. Rna-rna punika minekadi, déwa rna, pitra rna, rsi rna. Penauran rna mauteng antuk pikayunan susrusa. Pikaunan satwam. Pikayunan satam ngwetuang yadnyané mapikolih. Sapunika I Ketut Surna, S.Pd. mahbahang ring geguritan Indik Panca Yadnya, kacitak antuk Toko Buku Indra Jaya, Singaraja .

Yadnya ring Sanghyang  Widhi nénten antuk upakara kémanten. Dasar pikayuane sané banget pisan ngedengan. Yadnya sané manut sesuduk utawi  tatatitining ngwangun yadnya. Yadnya sané nyuastika, munggah, tedun, ka samping mangda anut kadasarin antuk tatwamasi :

Tetuweké kahaturang/ rasa hormat miwah bakti/ mantuk ring para déwata/ manusa utama jati/ kawéntenan maring gumi/ jadma sané patut nahur/ antuk bakti miwah yadnya/ kaajegang tatwamasi/ sané tuju/ masyarakat jagat hitha// ( Pupuh Sinom, 4 kaca 2)

Mangda nénten nirdon ngamargiang yadnya patut taler mangda uning ring kasukseman yadnyané. Tatujoné mangda pastika utawi kawirasaang , katelebang ring telenging pikayun. Wantah durung uning patut nglungsur pangandika ring sang maangga tapini. Sinalih tunggil sarana yadnya punika porosan. Sarana alit kasuksemané luih pisan. Porosan linggan Sanghyang Tri Murthi, Brahma, Wisnu, Siwa.Jambé linggan Sanghyang Brahma. Sedah Sanghyang Wisnu. Apuh linggan Sanghang Siwa:

Suksemané kahaturang/ indik porosan puniki/ jambé lambing Déwa Brahma/ basé lambang Sanghyang Wisnu/ apuh Sanghyang Siwa/ Hyang Tri Murthi/ sungsungané krama désa// ( Pupuh Ginada,7 Kaca 7).

Yadnya sane kamargiang mangda nyuastika, munggah tedun, ka samping taler margiang. Yadnya nénten marupa upakara kémanten taler marupa paripolah sané manut sastra. Manut ring tatatining dados manusa. Welas asih ring sang kalaran, ring sang katunan. Taler ngyadnyaang angga marupa pamargi sané patut. Yadnya puniki nénten ngambil prebia.