Kudiang jani ban madaya

Méh suba pangendan Widhi

Sanghyang Tuduh mangembakang

Bayané tong dadi tulung

Mamuktiang karmaphala

Gawéné nguni

Sangkan ada né tamiang

( I Nyoman Singgin Wikarman, G. I Gusti Wayan Kaprajaya,kaca 3)

Karmaphala sampun sering pisan kapireng.Punapi sané tandur punika sané jagi kapolihang. Sang mapineh,malaksana, mabaos patut, ayu jagi manggihin patut, mangihin ayu. Sapunika taler sané mapikayun,malaksana,mabaos nénten patut, nénten ayu.

Sakéwanten ring kauripan wénten taler anak sané satata mautsaha ayu,patut durung mrasidayang manggihin patut, utawi ayu. Samaliha sané nilar sesana kamanusan molihang kaledangan, kauripan sané becik. Sang wikan ngandikayang punika mawit saking paileh karmaphala. Pamarginé dumun becik sané mangkin pikolihang. Sang sané durung molihang sané kaapti sampunang surud-surud mapikayun, malaksana utawi mabaos sané utama. Santukan punapi sané margiang janten punika sané jagi terima nénten mangkin midep sentana utawi rikalaning kaicénin galah  manresti malih.

Sapunika taler pamargin pati-urip. Nénten wénten sané mrasidayang nyangcang utawi jagi ngibehang mangda sampunang séda utawi pati. Gumanti sampun pamargin titah Sanghyang Widhi. Yadiastun asapunika, sampunang ngrereh pati. Patiné gumanti mawit saking titah sanghyang Widhi. Nénten dados nyendetin yusa.

Kauripané puniki nénten surud-surud jagi ngamargiang karmaphala. Karma-karma sané ngawinang kautamaanné dados manusa punika patut utsahayang sarahina-sarahina. Nénten karma-karma sané ngawinang kamanusanné sayan cemer utawi nénten anut ring sesanan kamanusan. Sajeroning maurip karma-karma patut sayan margiang. Pakibeh jagat, pakibeh pamargin kauripan gumanti katah saneé ngoda rikalaning mamargi patut. Punika sampun biasa ring kauripan. Sayan utama dados manusa sayan katah pigodané ngrauhin punika anggéna sarana ngoda punapi jati patut, punapi mapi-mapi patut.

Yusa sané kawates puniki patut pisan anggén sarana ngamargiang karma-karma sané patut. Santukan karmané punika jagi nyarengin pamargin kauripané. Nénten mangkin, pungkuran utawi sentanané midep polih trestesan karma-karma sané patut.

Karma-karma patut serahina-rahina margiang. Karmané ayu,suci mapikolih ayu suci. Punapi sané margiang punika jagi katerima. Sané nerima midep sentana, janten pisan sané ngamagiang.